ఇదేం లాజిక్కు కోట్లబాబూ?

నిర్దోషివని తేలేంతవరకూ లొంగిపోవా? ఈ డైలాగు చూస్తుంటే నేను చదువుకునే రోజుల్లో చూసిన కొన్ని సినిమాల్లోని (పేర్లు గుర్తులేవు కానీ చిరంజీవి, బాలక్రిష్ణ గట్రా నటించినవి) హీరో చెప్పే డైలాగులు గుర్తుకొస్తున్నాయి. ఆ సినిమాల్లోనూ అంతే హీరో శానా మంచోడు, పక్కన హీరో ఫ్రెండు నిజాయితీ కల్గిన ఓ పోలీసు. హీరో అనుకోకుండా ఓ హత్యకేసులో ఇరుక్కుంటాడు. పోలీసు ఫ్రెండు అరెస్టు చేయబోతే హీరోగారు తనని అనవసంగా హత్యకేసులో ఇరికించారని డైలాగు మీద డైలాగు కొట్టి తనని తాను నిర్దోషినని నిరూపించుకున్నాకే మళ్ళీ కనిపిస్తానంటాడు (లొంగిపోతాననడు). మరో సినిమాలో సేమ్ సిచ్యుయేషన్ లో హీరోగారు విలన్ లందరినీ ఏరిపారేసి తన కక్ష తీర్చుకొని అప్పుడు లొంగిపోతానంటాడు. అలాగే మన కోట్ల చక్రపాణిగారు కూడా తనని తాను హీరో ననుకున్నారో లేక హీరో చెలికాడిననుకున్నారో గానీ ఆయననోటినుండీ సేమ్ డైలాగు. పాతసినిమాలో చూసిన సీన్లన్నీ భూచక్రం తిరిగినట్టు ఒక్కసారి కళ్ళముందు గిరగిరా తిరిగాయి. నిర్దోషివని తేలేంతవరకూ లొంగిపోవా? నిర్దోషివని తేలింతరువాత ఇక లొంగిపోవడమెందుకు కోట్లబాబూ, ఇదేం లాజిక్కు, దాని మర్మమేమి? ఓహ్హో!! ఈలోపు చక్కపెట్టవలసిన "రాజ"కార్యాలేమైనా వున్నాయా? రౌతు మెత్తనైతే గుర్రం మూడుకాళ్ళమీద దౌడుతీయును, వడ్డించేవాడు మనవాడైతే... (ఇలా చాలావున్నాయి సమయానికి గుర్తురావట్లేదు. చ!) వగైరా వగైరా వగైరా...