మనిషి కాదు, మృగమే!

టైటిల్ చూసి ఇదేదో సినిమా గురించి అనుకునేరు, అలాంటిదేమీ కాదు ఈరోజు ఈనాడు పేపర్ లో "24 ఏళ్ళుగా కూతురిపై అత్యాచారం" వార్త ని చూడగానే ఒళ్ళంతా ఒకటే కంపరం, అసహ్యం కలిగాయి. ఇది నిజమా కాదా తెలుసుకుందామని గూగుల్ ఆశ్రయిస్తే, నిజమేనని తెలిసింది. అది ఇచ్చిన కొన్ని లింకులను క్రింద ఇచ్చాను చూడండి. ఆస్ట్రియా దేశంలో ఒక కామాంధుడైన తండ్రి తన 11 సంవత్సరాల కూతురు ని దాదాపు 24 సంవత్సరాలపాటు తన ఇంటి క్రింది రహస్య గదిలో ఉంచి అత్యాచారం చెయ్యడంతో పాటు, ఆమె ద్వారా ఏడుగురు సంతానాన్ని కన్నాడట ఆ ప్రబుద్ధుడు. 24 ఏళ్ళ పాటు ఒక ఇరుకు రహస్య గదిలో ఉండడమంటే మాటలా? ఎంతబాధ పడిందో పాపం. ఈ విషయంలో భారతీయులు ఏమీ తక్కువ తినలేదు లేండి ఎందుకంటే ఈ మధ్య మనదేశంలో కూడా ఇటువంటి సంఘటనలను జరుగుతున్నాయని ఆమధ్య పేపర్ లో చూశాను. ఇలాంటి విషయాలు వింటున్నప్పుడు మనం తిరిగి ఆటవిక యుగం వైపు వెళుతున్నామేమో అనిపిస్తుంది. ఈ విషయం గురించి మరిన్ని వివరాలకు నేటి (29/4/2008) ఈనాడు పేపర్ చూడండి. మరిన్ని లింకులు క్రింద ఇవ్వబడ్డాయి.

• సి.ఎన్.ఎన్ , ఫాక్స్ న్యూస్, టైమ్, ద హెరాల్డ్

సందర్భం వచ్చింది కాబట్టి మరికొన్ని విషయాలు చెప్పుకుందాం. మంచైనా, చెడైనా చిన్నతనంలో నేర్చుకున్నది లేదా అనుభవించినది ఎప్పటికీ మర్చిపోలేము. అది చెడు అయితే జీవితమంతా నరకమే. "స్పర్శ" అనేది పెద్దలకీ పిల్లలకీ మధ్యన ఒక వారధిలా పనిచేస్తుంది, ప్రేమని పెంచుతుంది. మనం కరచాలనం చేసేది కూడా అందుకే. ప్రతిఒక్కరూ కూడా, వాళ్ళు తల్లితండ్రులైనా, బంధువులైనా, స్నేహితులైనా లేదా అపరిచితులైనా కూడా ఆ "స్పర్శ" ద్వారానే పిల్లలని ప్రేమిస్తారు. అయితే అది ఆత్మీయతని పంచే స్పర్శా లేక దురుద్దేశంతో కూడుకున్న స్పర్శ (చైల్డ్ సెక్సువల్ అబ్యూజ్ (C.S.A)) అనేది ఆ వయసు పిల్లలకి తెలిసే అవకాశంలేదు. తెలియచెప్పాల్సింది పెద్దలే ఎందుకంటే ఒక వయస్సువరకూ మన పిల్లల భవిష్యత్తు మనచేతుల్లోనే ఉంటుంది. C.S.A కి సంభందించిన మరిన్ని వివరాలకు సౌండ్ ఆఫ్ సైలెన్స్ అనే ఈ లింక్ చూడండి.